Líkt og greint var frá í morgun þá kviknaði í Seljaskóla í nótt. Allt tiltækt slökkvilið var kallað út eftir miðnætti vegna elds í þaki skólans, en nær allur eldur var farinn um fjögurleytið í nótt.

Jón Helgason, fyrrverandi nemandi skólans, segist dapur yfir því að gamla gaggó-deildin hans hafi brunnið, en hann náði loftmyndum af þakinu sem teknar voru úr dróna. Myndirnar voru teknar um áttaleytið í morgun.

„Frekar daprar fréttir núna í morgunsárið að gamla gaggó deildin mín í Seljaskóla brann í nótt. En þarna náði ég þeim merka áfanga að vera í. Ég var gjarnan kallaður „Jón movie“ á þeim tíma. En núna er þetta brunnið,“ segir Jón.

Jón segist hafa verið kallaður Jón „movie“ þegar hann var nemandi við skólann, en það á heldur betur við þegar litið er á myndirnar og myndbandið sem hann tók í morgun.