Dagur B. Eggertsson, borgarstjóri Reykjavíkur, gagnrýnir Sigmund Davíð Gunnlaugsson, formann Miðflokksins og fyrrverandi forsætisráðherra, harðlega í stöðufærslu á Facebook. Hann segir ríkisstjórn hans hafa gert ótrúlega dýr mistök þegar hún lækkaði framlög til uppbyggingar árið 2013.

„Árið 2013 gerði ríkisstjórn Sigmundar Davíðs Gunnlaugssonar það að sínu fyrsta verki að lækka auðlindagjöld á útgerðina og fresta eða skera niður mikilvæg framlög til verkefna einsog byggingu nýs Herjólfs, Hús íslenskunnar, vegagerð um land allt, framlög til uppbyggingar ferðamannastaða og tvöföldun framlaga í Kvikmyndasjóð svo dæmi séu nefnd. Þessi verkefni voru hluti af Fjárfestingaráætlun fyrir Ísland sem gekk út á að framkvæma á besta tíma í hagsveiflunni til að skapa störf og hagvöxt,“ segir Dagur.

Hann bendir svo sérstaklega á Hús íslenskunnar sem hefur reynst þremur milljörðum dýrara en var ráðgert árið 2013. „Þetta voru ótrúlega dýr mistök. Í vikunni birtist ein afleiðing af þessum óskynsamlegu ákvörðunum – Hús íslenskunnar reynist þremur milljörðum dýrara en ef í það hefði verið ráðist árið 2013,“ segir Dagur.

Honum grunar enn fremur að kostnaðurinn við nýjan Herjólf verði álíka mikill. „Mig grunar að munurinn á kostnaði við nýja Herjólfs hlaupi líka á stórum fjárhæðum og sömu sögu sé að segja af öðrum framkvæmdum sem frestað var (fyrir utan hvað er óskynsamlegt að láta Vestmannaeyinga og aðra landsmenn bíða). Síðast en ekki síst á þjóðin rétt á arði af auðlindunum og ótrúlegt að upphæð veiðigjalda hafi verið lækkuð gríðarlega 2013 – og allar götur síðan,“ segir Dagur.