Búast má við örtröð í ísbúðum og sundlaugum landsins á fimmtudaginn ef marka má veðurspá Veðurstofu Íslands. Spáð er að hiti verði 10 til 17 stig, en svalara á Austfjörðum.

Á höfuðborgarsvæðinu er spáð allt að 15 stiga hita og heiðskýrt. Almennur frídagur er þennan daga, sumardagurinn fyrsti, og má því ætla að flestir geti baðað sig í sólinni.

Í hugleiðingu veðurfræðings á vedur.is segir: „Á fimmtudag er áfram spáð austanátt, víða á bilinu 8-13 m/s, en 13-18 með suðurströndinni. Margir myndu eflaust vilja hafa rólegri vind á sumardaginn fyrsta. Góðu fréttirnar eru þær að vel ætti að sjást til sólar um tíma á öllu landinu. Hitinn verður eins og best gerist á þessum degi, ætti að ná kringum 15 stig í mörgum landshlutum, svalara þó með austurströndinni þar sem andar beint af hafi. Að lokum ber að taka fram að útlit er fyrir að það fari að rigna á sunnanverðu landinu að kvöldi fimmtudags.“