Óhætt er að segja að Einar Bárðarson athafnamaður heldur ekki vatni yfir nýrri heimildarþáttaröð sem sýnd er í sjónvarpi Símans. Þættirnir fjalla um kenningar Boris Quatram, þýsks rannsóknarblaðamanns, í Geirfinnsmálinu.

„Þessi heimildarmynd sprengdi á mér hausinn í nótt – fyrsti þátturinn fer rólega af stað ……. en Búmm. Er búið að leysa Geirfinns málið?,“ skrifar Einar á Facebook og deilir stiklu um þættina.

Meðal þess sem kemur fram í þáttunum er að eiginkona Geirfinns hafi átt elskuhuga. Sá maður heitir Vilhjálmur. Hann virðist hafa verið í Keflavík um það leyti sem Geirfinnur hvarf. Maðurinn býr núna í Þýskalandi og Boris Quatram hafði upp á honum við gerð heimildarmyndarinnar.

Þáttunum er lýst svo í kynningarefni: „Quatram fer aftur til upphafs rannsóknarinnar og skoðar fyrst það sem lögreglan lét vera að rannsaka og leitar svara um af hvaða hvötum það var gert. Sú vegferð dregur hann á myrkrar slóðir íslensks samfélags, þar sem margar nýjar og óvæntar staðreyndir koma í ljós. Sumir þræðirnir teygja sig langt út fyrir Ísland. Þessi áhrifamikla saga dómsmorða, sem hvíldu sem mara á íslensku þjóðfélagi um fjögurra áratuga skeið er sögð í fjórum þáttum.“