Héraðssaksóknari hefur til rannsóknar lát ungrar konu sem lést á þriðjudagsmorguninn eftir að lögregla hafði haft af henni afskipti. Í tilkynningu frá lögreglu um málið segir:

„Kona á þrítugsaldri lést á Landspítalanum á þriðjudagsmorgni s.l., en þangað hafði hún verið flutt með sjúkrabíl eftir að lögregla, í útkalli vegna meintrar fíkniefnaneyslu, hafði afskipti af henni. Ekki er hægt að veita frekari upplýsingar um málið, en því hefur verið vísað til embættis héraðssaksóknara sem rannsakar atvik þegar maður lætur lífið í tengslum við störf lögreglu óháð því hvort grunur er til staðar um refsivert brot.

Hugur lögreglunnar er hjá aðstandendum konunnar og vill hún koma á framfæri innilegum samúðarkveðjum til þeirra á þessari erfiðu stundu.“

Í frétt á RÚV kemur fram að konan var fædd árið 1994. Þar segir: „Lögregla hafði afskipti af konunni, sem var í annarlegu ástandi, og nokkru síðar fór hún í hjartastopp og lést.“