Lengi hafa verið uppi miklar svartsýnisraddir um kjarasamningana sem nú standa yfir. Að allt myndi fara í bál og brand – hér myndi allt loga í verkföllum. Forréttindahópar í samfélaginu hefðu gefið tóninn, forstjórar og toppar hjá ríkinu, og launþegahreyfingin myndi ekki sætta sig við neitt lítilræði.
En nú bendir allt til þess að samningar milli stórra stéttarfélaga, VR, Efling og Starfsgreinasambandsins og Samtaka atvinnulífsins séu að takast. Fréttamannafundi forsætisráðherra um aðkomu ríkisins var reyndar frestað í dag –en eftir því sem manni skilst eru allar líkur á að þar verði bundinn lokahnútur á samningana.
Takist þetta – sem allt bendir til – er það mikill áfangi fyrir ríkisstjórnina. Það eru margir samningar lausir um þessar mundir en það er næsta víst að önnur verkalýðsfélög, og þá líka ríkisstarfsmenn, muni semja á svipuðum nótum. Það er varla nein stemming fyrir öðru.
Eftir því sem manni skilst eiga samningarnir að gilda til 2022. Semsagt fram yfir kjörtímabil ríkisstjórnarinnar sem mun búa við frið á vinnumarkaði.
Þvert ofan í flestar spár.
