Kolbeinn Sigþórsson er mættur til Svíþjóðar en hann skrifaði undir tveggja og hálfs árs samning við AIK í dag.
Kolbeinn hefur ekkert spilað undanfarin tvö tímabil en hann var í kuldanum hjá Nantes í Frakklandi.
Hann fær nú tækifæri á að koma ferlinum á rétta braut og segist vera ánægður með tækifærið sem gafst í Stokkhólmi.
,,Ég er mjög ánægður, ég hef beðið eftir því að klára þetta í nokkra daga og er ánægður með að vera kominn hingað og fá þetta frábæra tækifæri til að komast á þann stað sem ég vil vera á,“ sagði Kolbeinn.
,,Ég veit að liðið er sænskur meistari og eitt stærsta félagið í Skandinavíu. Þeir eru með frábæra stuðningsmenn, ég hef séð klippur af þeim, af andrúmsloftinu.“
,,Ég hef ekki spilað mikið undanfarin tvö ár, síðasti leikur var í nóvember með landsliðinu. Ég þarf að taka eitt skref í einu og sjá hvar ég er þegar ég byrja að æfa hérna.“
,,Ég þarf að passa mig en ég vil komast á völlinn eins fljótt og hægt er. Félagið vill hjálpa mér að komast af stað í besta mögulega forminu. Vonandi verður það ekki langt.“
,,Ég þekki engan hér persónulega en ég veit hver Sebastian Larsson er, ég hef mætt honum þegar Ísland spilaði við Svíþjóð.“
Nánar er rætt við Kolbein hér fyrir neðan.
