Gunnar Smári Egilsson, fjölmiðlamaður og einn stofnenda Sósíalistaflokksins, kallar eftir því að stjórn Eimskip reki Baldvin Þorsteinsson úr stjórn félagsins. Baldvin, sem er stjórnarformaður Eimskips og sonur Þorsteins Baldvinssonar forstjóra Samherja, veittist í morgun að Má Guðmundssyni seðlabankastjóra.

Myndband af atvikinu má sjá á RÚV. Gunnar Smári segir þessa hegðun Baldvins lýsandi. „Hvað var ég að hlusta á í fréttum Ríkisútvarpsins? Var sonur stærsta kvótagreifans að leggja hendur á Seðlabankastjóra og þurftu þingmenn að ganga á milli? Og var formaður stjórnskipunar- og eftirlitsnefndar að segja að við yrðum að sýna því skilning að kvótagreifinn væri reiður? Þetta er eins og sena út Dickens eða Nexö, eitthvað frá frumárum kapítalismans þegar stórgrósserar gengu um með bumbuna á undan sér og voru að tjúllast úr frekju og yfirgangi,“ segir Gunnar Smári á Facebook.

Hann bætir svo við að það verði að bregðast við þessu. „Forseti Alþingis hlýtur að senda Má afsökunarbeiðni á eftir. Alþingi verður að tryggja því það fólki sem kallað er á fundi þingsins vernd fyrir ofbeldi. Það má ekki gera Klaustrið að viðmiðun mannlegra samskipta á þinginu. Stjórn Eimskip hlýtur svo að reka manninn á eftir. Fyrirtæki skráð í kauphöll getur ekki haft forstjóra sem leggur hendur á Seðlabankastjóra,“ segir Gunnar Smári.