Fjórir ríkustu einstaklingarnir í Indónesíu eiga jafn mikið og fátækustu hundrað milljónirnar í landinu. Íbúar Indónesíu eru rúmlega 250 milljónir talsins. Umræðan um mikinn ójöfnuð hefur verið áberandi í landinu á undanförnum árum og hefur forseti Indónesíu talað fyrir því að berjast þurfi gegn honum. Sýnilegur árangur virðist þó ekki hafa náðst.

Þetta kemur fram í nýrri skýrslu Oxfam International, bandalagi sem vinnur gegn fátækt og ójöfnuði í heiminum. Í skýrslunni kemur fram að Indónesía sé það ríki heims þar sem einna mestur ójöfnuður ríkir.

Þeir ríku verða sífellt ríkari og til marks um það hefur milljarðamæringum fjölgað tuttugufalt frá aldamótum. Árið 2002 átti einn einstaklingur í Indónesíu yfir einn milljarð Bandaríkjadala en árið 2016 voru þeir orðnir tuttugu talsins.

Í skýrslu Oxfam var tekið dæmi af bræðrunum Budi og Michael Hartono sem eru ríkustu menn Indónesíu. Eignir þeirra eru metnar á 25 milljarða Bandaríkjadala, en þeir auðguðust mjög á tóbaksfyrirtæki sínu. Í skýrslunni var bent á það að vextirnir sem bræðurnir fá af auðæfum sínum á ári myndu duga til að eyða sárustu fátæktinni í landinu.

„Frá árinu 2000 hefur efnahagur Indónesíu batnað til muna. En það hafa ekki allir notið góðs af honum og milljónir íbúa hafa setið eftir, einna helst konur.“

Fátækt í landinu hefur nokkurn veginn staðið í stað frá aldamótum en miðað við alþjóðleg viðmið er talið að 93 milljónir Indónesa lifi undir fátæktarmörkum.