Aron Einar Gunnarsson, landsliðsfyrirliði, ræddi við blaðamenn í kvöld eftir 4-0 tap gegn Frakklandi.

Um var að ræða leik í undankeppni EM en Ísland átti í raun aldrei möguleika gegn heimsmeisturunum.

,,Maður hafði fína tilfinningu fyrir leiknum, fyrri hálfleikurinn spilaðist eins og hann spilaðist. Við vorum nokkuð solid, við gáfum ekki of mörg færi á okkur,“ sagði Aron.

,,Við fengum á okkur mark sem við fáum ekki oft á okkur. Seinni bylgja eftir fast leikatriði en svo var seinni hálfleikurinn eins og fyrri hálfleikurinn á EM. Þeir komust of oft aftur fyrir okkur og við vorum einhvern veginn ekki á tánum.“

,,Ég veit ekki hvað það var, við náðum bara ekki að komast almennilega framan í þá og bárum kannski of mikla virðingu fyrir þeim. Þetta var illa tapað hjá okkur, 4-0 illa tapað.“

,,Það kemur kannski inn í hausinn á manni að maður er í séns og við þurfum bara eitt fast leikatriði til að skora en mér fannst við samt vera að bíða of lengi. Við lærum af því, það er hægt að tapa lærdóm af þessu.“

,,Við höfum spilað þetta system áður. Við fórum almennilega í gegnum það og eins og ég segi þá vorum við aðeins að finna okkur í fyrri hálfleik. Við kennum ekki systeminu um. Við vorum bara á hælunum og þá sérstaklega í seinni hálfleik.“

Nánar er rætt við Aron hér fyrir neðan.