Guðni Ágústsson, fyrrverandi ráðherra og þingmaður, gagnrýnir þáttinn Vikan með Gísla Marteini, Baldurssyni fyrir umfjöllun þeirra um íslensku sauðkindina í gær. Þetta kemur fram í grein hans í Morgunblaðinu.
„Skemmtifélag Gísla Marteins Baldurssonar hefur enn komið saman í vikulokin þar sem hláturinn, hið góða meðal sálarinnar, fékk útrás og svo voru felldir hálærðir dómar af léttúð um málefni sem kallað er mesta vá heimsins. Það er að segja hvernig sýklalyfjum er úðað í fóður dýra og sprautað í dýrin.“
Guðni var lítt hrifinn af umræðu þáttarins, og ekki var hann hrifnari af gestum Gísla.
„Gísli Marteinn! Þér finnst þessi útvaldi hópur þinn rosa skemmtilegur á föstudögum og oft er hann það. En stundum minnirðu á Jón sterka – ,,sástu hvernig ég tók hann?“.
Hann segir Helga Seljan ekki hafa birst honum sem rannsóknarblaðamaðurinn sem geri fréttaskýringaþáttinn Kveik, frekar hefði hann hagað sér eins og hann væri á leiðinni á ball.
„Og svo sat Arnþrúður Karlsdóttir þarna eins og friðardúfa og hló líka á kostnað læknavísindanna.“
Áhyggjuefni Guðna er, sem áður, sýklalyfjaónæmi sauðkinda og innflutningur á erlendu kjöti til Íslands, en hann hefur mikið talað gegn því að slíkur innflutningur verði heimilaður, helst ætti að banna hann með öllu.
„Alþjóðaheilbrigðisstofnunin er annar klúbbur, þar sitja ekki viðhlæjendur sem klóra hver öðrum svo hláturgusurnar ganga yfir hlustendur eins og hjá Gísla mínum Marteini. Nei, þar eru læknar og vísindamenn sem biðja börnum framtíðarinnar griða og þessi alheimslögregla heilbrigðismálanna krefst aðgerða gegn sýklalyfjaóþoli og segja að verði ekki brugðist við muni þessi ógn, sprottin upp undan græðgi lyfjamafíunnar og verksmiðjubúa í kjötframleiðslu, valda fleiri dauðsföllum en krabbamein eftir 50 ár.“
