Hinn tvítugi Hayden Cross hefur vakið umtalsverða athygli í heimalandi sínu Bretlandi og ekki að ástæðulausu. Hann ber barn undir belti.

Hayden fetar í spor Bandaríkjamannsins Thomas Beatie sem vakti heimsathygli árið 2008 þegar hann fæddi stúlkubarn eftir að hafa að hluta til gengist undir kynleiðréttingu. Mun Hayden mun verða fyrsti karlmaðurinn í sögu Bretlands til að ganga með barn. Hann fæddist í kvenmannslíkama en hóf að lifa sem karlmaður fyrir þremur árum og byrjaði að gangast undir viðeigandi hormóna og sálfræðimeðferð. Hann er í dag skráður sem karlmaður í þjóðskrá.

Í samtali við Mirror segir Hayden að börn hafi ætíð verið á stefnuskránni og það hafi verið hans heitasta ósk að eignast barn sem væri líffræðilega hans eigið. Í kjölfar þess að hafa verið neitað um að láta frysta egg sín tók hann því ákvörðun um að gera hlé á kynleiðréttingarferli sínu til þess að geta gengið með og fætt barn.

Eftir að hafa fundið sæðisgjafa með hjálp samfélagsmiðla er þessi ungi piltur nú kominn rúmlega fjóra mánuði á leið en hann mun hefja kynleiðréttingarferlið á ný fljótlega eftir að fæðingin er afstaðin og láta þá fjarlægja eggjastokka sína og leg.

Hayden viðurkennir að það sé ansi krefjandi að ganga í gegnum þær breytingar sem verða á líkamanum á meðgöngu, enda sé það „einkar kvenlegt“ að ganga með barn og stangist á við flesta karllæga eiginleika hans. Hann upplifi þess vegna eins og hann sé að fara í öfuga átt við kynleiðréttingarferlið. Hann kveðst jafnframt óttast fordóma fólks en vonar að hans frásögn muni hvetja aðra til verða sáttir í eigin skinni.