Katrín Jakobsdóttir forsætisráðherra, segir að stærsta forgangsmálið nú í kjölfar úrskurðar Mannréttindadómstóls Evrópu, sé að tryggja réttaröryggi og vinnufrið. Hún styður ákvörðun dómsmálaráðherra að stíga til hliðar meðan málið er til lykta leitt.
Sigríður Andersen sagði að áhersla yrði lögð á að vísa úrskurðinum til yfirréttar MDE, sem yrði í fyrsta skipti sem það yrði gert af Íslands hálfu.
Katrín segir það ekki liggja fyrir hversu lengi Sigríður verður frá, eða hver tekur við embætti hennar og vissi hún ekki af ákvörðun hennar fyrirfram.
Hvort Sigríður eigi afturkvæmt aftur í ríkisstjórn sagði Katrín:
„Það er ekki tímabært að segja til um það.“
Sigurður Ingi Jóhannson, formaður Framsóknar, segist styðja ákvörðun Sigríðar og vissi ekki af henni fyrirfram. Hann sagði dóm MDE fordæmalausan og því kallaði hann á að honum yrði áfrýjað.
Hann neitaði því að líf ríkisstjórnarinnar væri undir því komið hvort Sigríður hefði sagt af sér eða ekki.
Hann vildi ekki útiloka að Sigríður ætti afturkvæmt í embætti sitt.
