Í drögum að nýju frumvarpi um breytingar á lögum um Seðlabanka Íslands er gert ráð fyrir að bankastjórar Seðlabankans verði fjórir; einn aðal og þrír varabankastjórar, en þeir munu skipta með sér verkum, einn fari með peningamál, annar með beri ábyrgð á fjármálastöðugleika og sá þriðji verði yfir fjármálaeftirliti sameiginlegrar stofnunar Seðlabankans og Fjármálaeftirlitsins. Markaðurinn, viðskiptablað Fréttablaðsins, segist hafa heimildir fyrir þessu.
Í fréttinni segir að frumvarpið verði rætt á fundi ráðherranefndar um efnahagsmál og endurskipulagningu fjármálakerfisins á morgun, en verði frumvarpið samþykkt er gert ráð fyrir að það taki gildi frá og með 1. janúar á næsta ári.
Þegar hefur verið tilkynnt um að Fjármálaeftirlitið og Seðlabankinn hyggist sameinast og tryggja eftirlit og heildasýn fjármálakerfisins. Ráðherranefnd um efnahagsmál og endurskipulagningu fjármálakerfisins hóf endurskoðun lagaumgjarðar, peningastefnu, fjármálaeftirlits og þjóðhagsvarúðar með sérstakri verkefnisstjórn sem skipuð er fulltrúum úr fjármálaráðuneytinu, Seðlabankanum og FME. Mun verkefnastjórnin skila drögum sínum að lagafrumvörpum til ráðherranefndarinnar eigi síðar en á morgun, 28. febrúar.
Þá er búið er að auglýsa stöðu seðlabankastjóra, þar sem skipunartími Más Guðmundssonar rennur út þann 20. ágúst.
