Þetta átakanlega en hjartnæma augnablik af tíkinni Mollie að kveðja eiganda sinn Ryan Jessen í hinsta sinn hefur farið sem eldur í sinu um netheima í vikunni.

Það var í síðasta mánuði sem Jessen, frá Kaliforníu í Bandaríkjunum, hélt að hann væri að fá svæsið mígreniskast. Annað kom á daginn því skömmu síðar var hann lagður inn á spítala vegna heilablæðingar sem hann náði sér ekki af. Fjölskylda og ástvinir hans komu saman á sjúkrahúsinu þann 30. nóvember síðastliðinn til að kveðja hann. Fengu þau leyfi fyrir að hafa tíkina Mollie með í för en hún og Ryan voru afar náin.

Systir hans deildi síðan meðfylgjandi myndbandi af augnablikinu þegar Mollie fær að kveðja eiganda sinn á dánarbeðinum á Facebook degi síðar. Myndbandið hefur farið víða síðan þá og snert hundruð þúsunda áhorfenda.

„Ef þú þekktir bróður minn, þá veistu að hann elskaði þennan yndislega hund,“ skrifaði Michelle Jensen í færslunni með myndbandinu. Þar má sjá Mollie, augljóslega í uppnámi, að þefa af eiganda sínum á merkingarþrunginn hátt, nánast eins og hún sé að grátbiðja hann að standa upp og jafna sig á þessu á sama tíma og hún áttar sig á því að eitthvað alvarlegt er að.

Michelle upplýsir einnig að bróðir hennar hafi verið líffæragjafi og að 17 ára piltur frá Kaliforníu, sem á afmæli á jóladag, hafi fengið hjartað úr Ryan.

Fjölskyldan kveðst snortin yfir þeim stuðning og samúðarkveðjum sem henni hafa borist síðustu daga.

Ryan Jessen var 33 ára gamall þegar hann lést.