Það má kallast kraftaverk að Michael Finn, 28 ára, sé enn á lífi eftir að hafa setið fastur í bíl sínum sem endaði á hvolfi út í ískaldri á í Kaliforníu á miðvikudaginn. Hann sat fastur í bílnum í fimm klukkustundir. Það varð honum til lífs að smá súrefnisbóla hafði myndast við höfuð hans svo hann gat andað.

Björgunarliði var gert viðvart um að rauð Ford Fusion bifreið væri á hvolfi í Klamath River í Siskiyou sýslu síðdegis á miðvikudaginn. Neyðarljós bifreiðarinnar voru kveikt og höfðu vakið athygli vegfarenda á henni.

Ekki var vitað að Finn væri inn í bifreiðinni fyrr en hún hafði verið dregin á land með dráttarbíl um klukkan 20. Finn sagði björgunarmönnum að hann teldi sig hafa lent í ánni um klukkan 15.

Björgunarmenn segjast aldrei hafa lent í máli sem þessu þar sem einhver hafi lifað svona langa dvöl í ísköldu vatni af.

Finn var fluttur á sjúkrahús og er þar enn en læknar segja að starfsemi innri líffæra hans hafi verið í ójafnvægi eftir þessa erfiðu dvöl í ísköldu vatninu.