Helga Arnardóttir fjölmiðlakona segir alvarlegan forsendubrest hafa orðið á samstarfi hennar við Birting og segir framkomu fyrrum vinnuveitenda hennar hafa ollið sér miklum vonbrigðum. Líkt og DV greindi frá í gærkvöldi er Helga hætt sem yfirritstjóri Birtings eftir einungis mánuð í starfi.

Helga hóf störf hjá Birtingi 2. janúar og fagnaði sínu fyrsta blaði fyrir skömmu, þegar Mannlíf kom út. Það hefur ekki farið mikið fyrir þessu nýja fríblaði, Mannlíf sem er dreift frítt á höfuðborgarsvæðinu og þótti síðasta og eina blað Helgu bera nokkuð af þeim blöðum sem hafa komið út hjá Birtingi. Helga átti að hafa yfirumsjón með áframhaldandi stafrænni uppbyggingu og halda utan um vefinn mannlif.is.

Á vef Birtings segir að Birtingur og Helga hafi komist að samkomulagi um starfslok. „Helga hóf nýlega störf hjá útgáfunni en sameiginleg ákvörðun aðila var að slíta samstarfinu og vill stjórn Birtings þakka henni fyrir samstarfið.“

Helga tjáir sig um málið á facebook síðu sinni fyrir stundu og birtir eftirfarandi yfirlýsingu:

„Í ljósi frétta af starfslokum mínum hjá Birtingi tel ég rétt að eftirfarandi komi fram:

Fyrir áramót sagði ég upp föstu starfi mínu hjá Ríkisútvarpinu og var ráðin sem yfirritstjóri Birtings. Uppi voru fögur fyrirheit og stór áform um að ráðast í töluverðar breytingar á Birtingi með tilkomu nýrra eigenda meðal annars í stafrænni uppbyggingu. Þegar til kastanna kom voru öll slík áform á sandi reist. Nokkrum dögum eftir að ég tók til starfa var útlit fyrir að um mjög alvarlegan forsendubrest yrði að ræða á minni ráðningu.

Stjórnendur tilkynntu mér þá einhliða ákvörðun þeirra um að verkefnum mínum og hlutverki yrði gjörbreytt og ég mótmælti þeim áformum. Eftir þann tíma var mér ljóst að ég naut ekki stuðnings stjórnenda Birtings í þeim breytingum sem ég var ráðin til að leiða. Þá naut ég ekki heldur þess ritstjórnarlega sjálfstæðis við útgáfu Mannlífs sem ég tel nauðsynlegt grundvallaratriði til að starfa við í frjálsri og óháðri fjölmiðlun.

Ég hef einungis starfað á tveimur fjölmiðlum á mínum 15 ára ferli og átt gott og heilbrigt samstarf við atvinnurekendur mína og samstarfsmenn á þeim tíma. Framkoma vinnuveitenda á þessum skamma tíma hjá Birtingi olli mér miklum vonbrigðum og eftir átján daga í starfi var alveg ljóst að forsendubrestur væri kominn í þetta samstarf og því yrði ekki haldið áfram.“