Frá því klukkan 18.50 til 21.07 í gærkvöldi var lögreglunni á höfuðborgarsvæðinu tilkynnt um innbrot í þrjár bifreiðar í miðborginni. Úr þeim var meðal annars stolið farangri erlendra ferðamanna. Klukkan 21.50 var maður handtekinn grunaður um innbrotin og þjófnaðina. Hann var vistaður í fangageymslu vegna rannsóknar málanna.

Klukkan 22.46 var tilkynnt um líkamsárás í veitingahúsi í hverfi 108. Árásarþolinn var fluttur á slysadeild til aðhlynningar en hann var með áverka í andliti. Meintur árásarmaður var farinn af vettvangi þegar lögreglan kom en vitað er hver hann er.

Klukkan 03.55 var maður handtekinn í Grafarholti en hann er grunaður um brot á vopnalögum og fleiri brot. Hann var í annarlegu ástandi og var vistaður í fangageymslu.

Á níunda tímanum í gærkvöldi var maður handtekinn á veitingahúsi í miðborginni. Hann var í annarlegu ástandi og er grunaður um vörslu fíkniefna. Hann var vistaður í fangageymslu.

Tveir ökumenn voru handteknir í gærkvöldi og nótt grunaðir um akstur undir áhrifum fíkniefna. Annar þeirra er jafnframt grunaður um að hafa verið undir áhrifum áfengis.