Yfirvöld í Kaliforníu hafa staðfest að 31 hafi látið lífið í hinum gríðarlegu gróðureldum sem nú geisa í ríkinu. 228 til viðbótar er saknað. Þetta er mesta manntjón sem hefur orðið í gróðureldum í ríkinu.

Cory Honea, lögreglustjóri í Butte sýslu, sagði í gærkvöldi að fimm lík hafi fundist í heimahúsum og eitt í bíl í bænum Paradise.

Yfirvöld í ríkinu hafa beðið Donald Trump, Bandaríkjaforseta, um að lýsa yfir neyðarástandi í ríkinu svo það geti fengið alríkisaðstoð í baráttunni við eldana og eftirleik þeirra. Gríðarlegt eignatjón hefur orðið. Baráttan við eldana gengur ekki vel en hvasst er á svæðinu þar sem þeir loga og því erfitt að hemja útbreiðslu þeirra.