Aðildarfyrirtæki í Samtökum atvinnulífsins hafa sagt upp samtals 3.100 manns á undanförnum þremur mánuðum og horfur fyrir næstu þrjá mánuði eru svipaðar. Þetta kemur fram í frétt í Morgunblaðinu í dag og eru upplýsingarnar byggðar á könnun sem könnunarfyrirtækið Maskína gerði. Sex hundruð fyrirtæki tóku þátt í könnuninni.

Halldór Benjamín Þorbergsson, framkvæmdastjóri SA, segir í viðtali við Morgunblaðið:

Ég vil alls ekki að við förum að mála skrattann á vegginn. Það er of snemmt að fullyrða hvað er þarna nákvæmlega á ferðinni. Það hefur verið mikil eftirspurn eftir fólki í flestum atvinnugreinum síðustu misseri og metinnflutningur vinnuafls. Þó verð ég að segja að sú mynd sem þarna birtist okkur er nokkuð áhyggjuefni.“