Frá áramótum hafa 533 sótt um hæli hér á landi sem er töluverð fækkun miðað við sama tíma í fyrra en þá sóttu 885 um hæli. Flestir hælisleitendanna eru frá Írak eða 89. Næst koma Albanar eða 70 talsins. 33 Afganar sóttu um hæli og 32 Pakistanar. 31 er frá Sýrlandi og 26 frá Georgíu og Sómalíu.

Morgunblaðið skýrir frá þessu. Fram kemur að samkvæmt gögnum frá Útlendingastofnun séu flestir umsækjandanna fullorðnir karlmenn. 10 fylgdarlaus börn hafa sótt um hæli, átta drengir og tvær stúlkur. Sex drengjanna eru frá Afganistan, einn frá Albaníu og einn frá Sómalíu. Stúlkurnar eru frá Pakistan og Sómalíu.

Hælisleitendurnir eru frá 59 ríkjum. Þar á meðal eru Egyptaland, Marokkó, Rússland, Indland, Pólland, Bandaríkin, Kanada og Þýskaland.