Stráin fyrir utan braggann í Nauthólsvík eru á svartlista í Evrópu yfir ágengar plöntur. Þetta segir Hafsteinn Hafliðason garðyrkjumaður í samtali við MBL í dag. Líkt og Eyjan greindi fyrst frá í gær eru stráin flutt inn frá Danmörku, þau eru höfundarréttarvarin og af tegundinni dúnmelur sem er náskylt melgresi sem vex hringinn í kringum landið.
Sjá einnig: Þessi strá fyrir utan braggann kostuðu 757 þúsund krónur – Höfundaréttavarin og keypt frá Danmörku
Hafsteinn segir að dúnmelur sé á skrá víða í Evrópu yfir svartlistaðar tegundir og lagt hafi verið til að slíkt hið sama verði gert hér á landi. „Sá listi hefur aldrei verið löggiltur, en á honum er fullt af plöntum sem eru erlendar og ágengar,“ segir Hafsteinn. Segir hann jafnframt að dúnmelur sé á bannlista á mörgum ríkjum Evrópu, en hann geti verið ágengur á ákveðnum stöðum.
Dúnmelur er ekki á lista MAST yfir plöntur sem er bannað að flytja til landsins, en bannað er að flytja inn villtar plöntur erlendis frá.
Plantan kemur upprunalega frá vesturströnd Norður-Ameríku. Henni var sáð fyrir nokkrum áratugum hér á landi í Fljótshlíðinni sem og víðar en hafi horfið. Í grein Menju von Schmalensee Vágestir í vistkerfum – Framandi og ágengar tegundir á Íslandi leggur hún til að dúnmelur verði bannaður hér á landi.
Að sögn Hafsteins er dúnmelurinn nokkuð harður af sér og mun lifa af íslenskan vetur, fagurkerum eflaust til mikils léttis:
„Já já, hann mun gera það. Hann er sko norrænn, hann vex um austurströnd Norður – Ameríku og norður fyrir og alveg til Grænlands. Hann er í raun ameríska útgáfan af melgresi.“