Elín Fjóla er tveggja ára búkona sem elskar að elda með mömmu sinni, Jónu Hammer. Þær mæðgur brasa mikið saman og fór Jóna að taka upp myndbönd af Elínu sem slógu í gegn hjá vinum þeirra.
„Þetta byrjaði þannig að hún Elín Fjóla vildi alltaf vera með mér í eldamennskunni og öðru. Hún er alveg ekta búkona, með allt á hreinu. Svo er hún svakalega skýr í tali, bara tveggja ára gömul,“ segir Jóna í samtali við Bleikt.
Fyrsta myndbandið sem þær mæðgur gerðu var þegar Elín var að elda pylsur og í kjölfarið bað fólk um fleiri myndbönd af henni.
„Fólk bað um að fá fleiri vídeó af henni vera að græja kvöldmatinn svo ég bjó til snapp fyrir hana. Það heitir bubbabrasar og sýnum við frá því hvað hún er að brasa.“
Eldamennskan er þó ekki eina áhugamál Elínar en hún á einnig fjóra sleðahunda sem hún sinnir með móður sinni þar sem þær búa í Klettagljúfri rétt fyrir utan Hveragerði.
„Henni finnst þetta ekkert mál, hún er svona allt í öllu kona.“
Myndband af Elínu má sjá hér að neðan og má með sanni segja að þessi unga dama sé alveg með það á hreinu hvernig sé að vera snappari í dag:
