Kristinn Sigurjónsson, fyrrverandi lektor við tækni-og verkfræðideild HR, segir í viðtali við Eirík Jónsson að eftir að DV greindi frá ummælum hans um að hann vildi helst ekki vinna með konum að honum hafi boðist tveir kostir, að vera rekinn eða segja upp sjálfur. Ljóst er á samtali Kristins við Eirík að hann er afar ósáttur.

Kristinn segir við Eirík að strax degi eftir frétt DV um málið á miðvikudaginn í síðustu viku hafi mannauðsstjóra HR, Sigríði Elínu Guðlaugsdóttur, skellt tveimur pappírum á borðið, annars vegar uppsagnarbréfi frá skólanum og hins vegar uppsagnarbréfi frá honum sjálfum sem hann hafi einungis þurfta að skrifa undir. Kristinn segir:

„Ég gerði hvorugt og er að hugsa minn gang. Ef ég segi upp sjálfur fæ ég einn aukamánuð greiddan ofan á þriggja mánaða laun þannig að það skiptir ekki öllu. Ég er 64 ára og geng ekki svo auðveldlega í annað starf. Ætli ég verði ekki að fara á atvinnuleysisbætur.“

Hann segir að ummæli sín hafi farið fyrir brjóstið á samstarfskonum hans. „Þetta fór allt mjög fyrir brjóstið á konunum í HR og þá ekki síst mannauðsstjóranum. En ekki finnst mér það sæma háskóla að virða ekki skoðana – og tjáningafrelsi starfsmanna á lokuðum spjallþræði á netinu,“ segir Kristinn við Eirík.

Ummælin sem Kristinn lét falla voru eftirfarandi: „Ég er svo hjartanlega sammála, það á að aðgreina vinnustaði karla og kvenna. Vandinn er bara að konur reyna alltaf að troða sér þar sem karlmenn vinna, og um leið og þær eru komnar inn, þá byrja þær að eyðileggja hann, því allir kalmennirnir eiga þá að fara að tala, hugsa og hegða sér eins og kerlingar, allt annað er áreiti og ef sagður en neðanbeltisbrandari, svo ég nefni ekki klámbrandari, þá er það kynferðisofbeldi.“