Eru Gunnar Smári Egilsson og Sósíalistaflokkur Íslands alls ráðandi í verkalýðsfélaginu Eflingu? Það má ráða af umfjöllun Morgunblaðsins í dag um átök á skrifstofu félagsins. Segir þar að gjaldkeri félagsins til áratuga hafi verið sendur í ótímabundið veikindaleyfi fyrir að hafa neitað að greiða reikning upp á eina milljón króna til eiginkonu Gunnars Smára Egilssonar, Öldu Lóu Leifsdóttur. Gunnar Smári er formaður Sósíalistaflokks Íslands sem er helsti bakhjarl formanns Eflingar, Sólveigar Önnu Jónsdóttur, sem var kosin formaður í vor. Listi undir forystu hennar felldi þá lista Sigurðar Bessasonar og félaga hans. Hægri hönd Sólveigar er Viðar Þorsteinsson, félagi í Sósíalistaflokknum. Í umfjöllun Morgunblaðsins er fullyrt að átök og vondur andi á skrifstofu félagsins hafi fylgt þeim tveimur.

Reikningurinn frá eiginkonu Gunnars Smára var fyrir ljósmyndun og önnur verkefni fyrir félagið. Er hún sögð áður hafa fengið greiddar um fjórar milljónir frá félaginu fyrir svipuð verkefni. Gjaldkerinn neitaði að greiða reikninginn án þess að bera hann undir stjórn félagsins og bókari félagsins studdi hann í þeirri ákvörðun. Afleiðingin af þeim mótþróa er sú að báðir þessir starfsmenn eru nú komnir í ótímabundið veikindaleyfi og mál þeirra eru jafnframt í höndum lögmanna sem undirbúa málsókn á Eflingu.