Hannes Hólmsteinn Gissurarson segir að Bretar eigi að biðja Íslandinga afsökunar vegna framgöngu sinnar í hruninu. Það er ýmislegt til í því. Breska stjórnin kom illa fram við okkur. Það degur heldur ekkert úr því að Íslendingar hegðuðu sér sjálfir eins og glópar. Skýringar á fyrirbæri eins og hruni efnahagskerfis eru oftastnær margþættar.

En það er erfitt fyrir Breta að biðja afsökunar. Auðvitað gera þeir það aldrei. Það er líka spurning hvar þeir eigi að byrja í afsökunarbeiðnum. Ekki hafa þeir beðið okkur afsökunar á þorskastríðinu og yfirganginum þá. Og svo er hægt að halda áfram, nýlendutíminn og allar þjóðirnar sem Bretar arðrændu, tróðu á og tröðkuðu. Eitt sinn var sá tími að sólin settist aldrei í heimsveldinu breska.

Bretar trúðu því meira að segja sjálfir að þeir væru að gera öðrum þjóðum gott með því að kúga þær og undiroka og stela frá þeim öllu steini léttara. Það var kallað the civilizing mission – að breiða út siðmenningu. Það eimir meira að segja eftir af þessu, til dæmis í viðhorfinu til Brexit.

Svo það er ansi langt í að Bretar fari að biðjast afsökunar.

Vinur minn einn setti kortið hér að ofan inn á Facebook. Það er kannski ekki alveg hárnákvæmt, en það sýnir lönd sem Bretar hafa ráðist á í tímans rás. Löndin sem þeir hafa látið í friði eru hvít.