Helgi Seljan, sjónvarpsmaður hjá RÚV, gagnrýnir harðlega nýfallinn dóm í máli Vals Lýðsson á samfélagsmiðlum. Valur var í gær dæmdur í sjö ára fangelsi fyrir að hafa valdið dauða bróður síns, Ragnars Lýðssonar. Helgi veltir fyrir sér hvers vegna ölvun Vals sé honum til refsilækkunar. Valur sagðist ekkert muna eftir atburðinum vegna ölvunar en neitaði að hafa banað bróður sínum af ásetningi.

„Ég get ekki skilið niðurstöðu héraðsdóms Suðurlands í þessu sorglega manndrápsmáli, sem gekk í dag. Eða öllu heldur botna ég illa, tvennt í röksemdarfærslu dómsins: „en ekki verður talið að honum hafi verið ljóst að langlíklegast væri að afleiðingarnar yrðu þær að hann myndi lenda í bráðri andnauð vegna banvænnar innöndunar magainnihalds og láta lífið af þeim sökum.“ -þurfti ákærði sumsé að hafa lokið kandídatsnámi í læknisfræði til þess að honum hefði mátt verða ljóst um afleiðingar gjörða sinna; að sparka og berja varnarlausan mann, ítrekað?,“ spyr Helgi á Facebook.

Hann bendir enn fremur á að dómari virðist telja að ölvun Ragnars hafi átt þátt í dauða hans. „Þá verður ekki fram hjá því litið að ölvunarástand hins látna átti að mati réttarmeinafræðings þátt í dauða hans.” -Það er freistandi að fara hér að velta vöngum yfir pilsasídd. En bara þetta: Hversu fullur þarf maður að vera til þess að ekki sé hægt að líta framhjá því þegar maður er drepinn, alla vega virða það morðingjanum til refsilækkunar?,“ spyr Helgi. Hann heldur áfram með þennan síðasta punkt á Twitter og skrifar: „Þessi dómur er stórskrýtinn. Þetta meikar engan sens. Hversu fullur má maður vera til þess að einhver megi berja mann til dauða?“

Að lokum spyr hann hvort dómari hefði tekið eins á málinu ef Valur hefði verið undir áhrifum annars vímuefnis. „Ef maðurinn sem drap bróður sinn í ölæði hefði verið 22 ára og með kannabis og rítalín í blóðinu (jafnvel sprautuför í hnésbótinni) haldiði þá að fjölskipaður dómur hefði gengið jafn langt í fá hann dæmdan fyrir vægari sök, eins og raunin varð? Yeah right!“

Ef maðurinn sem drap bróður sinn í ölæði hefði verið 22 ára og með kannabis og rítalín í blóðinu (jafnvel sprautuför í hnésbótinni) haldiði þá að fjölskipaður dómur hefði gengið jafn langt í fá hann dæmdan fyrir vægari sök, eins og raunin varð?

Yeah right!

— Helgi Seljan Jóhannsson (@helgiseljan) September 25, 2018