Nýlega var skýrt frá því að Guðlaugur Þór Þórðarson, utanríkisráðherra, hefði skrifað undir bókun, sem átti að ryðja úr vegi hindrunum fyrir útflutningi á lambakjöti til Kína, ásamt ráðherra tollamála í Kína. En ekki er allt sem sýnist í þessu máli og þessi bókun mun ekki koma að miklu gagni.

Þetta kemur fram í Morgunblaðinu í dag. Þar segir að það sé aðeins sláturhúsið á Kópaskeri, Fjallalamb, sem fái heilbrigðisvottun og það eingöngu til útflutnings á lambakjöti. Fjallalamb má ekki flytja út innmat, hausa né kjöt af fullorðnu fé. Sláturhúsið getur flutt út um 120-130 tonn á ári en á undanförnum árum hefur heildarútflutningurinn numið um 3.000 tonnum. Lengi hefur verið beðið eftir að kínverski markaðurinn opnaðist fyrir lambakjöt eða frá því að fríverslunarsamningur ríkjanna var undirritaður fyrir fimm árum.

Fyrrgreind bókun utanríkisráðherra og ráðherra tollamála í Kína átti að ryðja úr vegi hindrunum fyrir þessum útflutningi samkvæmt tilkynningu frá utanríkisráðuneytinu. Ágúst Andrésson, forstöðumaður kjötafurðastöðvar KS, sagði í samtali við Morgunblaðið að þessar takmarkanir væru áframhaldandi tæknilegar innflutningshindranir en þær byggja á að sláturhús Fjallalambs sé eina sláturhúsið sem er utan riðuveikivarnasvæða.