Peningaþvættismálið sem Danske Bank, stærsti banki Danmerkur, er flæktur í vindur upp á sig með degi hverjum og stefnir hraðbyri í að verða eitt stærsta mál þessarar tegundar í heiminum. Nú hefur rannsókn málsins verið aukin að umfangi og snýr nú að færslum á allt að 960 milljörðum danskra króna í gegnum útibú bankans í Eistlandi á árunum 2007 til 2015.

Það er Wall Street Journal sem skýrir frá þessu í dag og vísar í ónafngreinda heimildarmenn. 960 milljarðar danskra króna svarar til tæplega 17.000 milljarða íslenskra króna. Fyrr í vikunni var rætt um að upphæðin gæti numið allt að 192 milljörðum danskra króna en það svarar til um 3.300 milljarða íslenskra króna.

Wall Street Journal bendir á að ekki sé vitað hversu stór hluti af þessari upphæð tengist hugsanlega peningaþvætti en upphæðin bendi til að málið sé miklu stærra en upphaflega var talið.

Hlutabréf í Danske Bank hafa hríðfallið í verði í dag í kjölfar fréttar Wall Street Journal.