Kristín Björg Björnsdóttir skrifaði nýverið lokaritgerð við mannfræðideild Háskóla Íslands. Ritgerðin fjallar um hvernig sambönd manna og dýra geta verið eins ólík og þau eru mörg, eins og hún orðar það sjálf í útdrætti. Í ritgerðinni leggur Kristín áhersla á að skoða kynferðisleg sambönd milli manna og dýra og þeirra einstaklinga sem upplifa sig sem dýrkynhneigða. Stundin fjallar um ritgerð Kristínar í dag ræðir við formann Dýraverndarsambands Íslands sem er alfarið á móti því að manneskjur hafi samfarir við dýr.
Samræði manna við dýr var löglegt á Íslandi allt til ársins 2014 þegar ný heildarlög um velferð dýra tóku gildi. Bannið gildir þó aðeins um um hryggdýr, smokkfiska, tífætlukrabba og býflugur. Hallgerður Hauksdóttir, formaður Dýraverndarsambands Íslands, segir í samtali við Stundina að mikilvægt sé að opna umræðuna um kynferðislegt samneyti manna við dýr. „Við teljum kynlíf með dýrum óréttlætanlegt, óháð því hvaða dýrategund er um að ræða, óháð því hvaða atferli dýrið sýnir og alveg sama hvaða hneigðir menn hafa. Maðurinn nýtur yfirburðastöðu gagnvart öðrum dýrum og kynmök fólks með dýrum er misbeiting á því valdi,“ segir Hallgerður.
Í viðtali við Stundina segir Kristín frá því að hugmyndin að ritgerðinni hafi kviknað þegar hún var í skiptinámi á Englandi. Þar las hún grein um mann sem var ástfanginn af hestinum sínum. „Mér fannst greinin svo merkileg, því það var ekkert ógeðslegt við lýsingar mannsins. Ég fékk enga klígju því þetta virtist vera hrein ást með samþykki hans og merarinnar. Þetta opnaði augu mín fyrir því að það eru ekki endilega allir ógeð sem stunda kynlíf með dýrum,“ segir Kristín.
Í ritgerðinni fjallar Kristín um sögu dýrahneigðar sem á virðist eiga langa sögu sem nær allt til Egyptalands til forna. Hún segir málið mikið tabú í nútímaþjóðfélagi. „Líklegasta ástæðan er sú að fólk tengir athafnir dýrkynhneigðar við barnaníð. Það er litið svo á að það sé verið að stunda kynlíf með dýri sem hefur ekki möguleika á að gefa samþykki,“ skrifar Kristín í ritgerðinni sem lesa má í heild hér.
Ítarleg umfjöllun um málið má lesa nýjasta tölublaði Stundarinnar.
