Ferðaskrifstofan Kilroy sendi í dag bréf til forsvarsmanna Útvarps Sögu, Péturs Gunnlaugssonar og Arnþrúðar Karlsdóttur, þar sem þeim er boðið í einstaka menningarreisu til Jórdaníu. Ástæðan er sú að forsvarsmönnum Kilroy hefur sárnað umræðurnar á útvarpsstöðinni.

„Að undanförnu hefur okkur þótt illa vegið að öðrum framandi menningarheimum og þá helst Mið-Austurlöndum. Þessvegna skorum við hér með á ykkur, Arnþrúði Karlsdóttur útvarpsstjóra og Pétur Gunnlaugsson útvarpsmann, að þiggja boð okkar um að heimsækja Jórdaníu og upplifa þar öll þau stórkostlegu menningarundur sem þar er að finna,“ segir í bréfinu.

Tekið er fram að flug, gisting og leiðsögn um Amman, höfuðborg Jórdaníu, er innifalið í boðinu.

„Við teljum þetta vera einstakt tækifæri til þess að víkka sjóndeildarhringinn, kynnast arabískri menningu og smakka á öllum þeim fjölbreyttu réttum sem þar eru í boði. Í kjölfarið vonum við að þessi ferð geti haft jákvæð áhrif og leiði til upplýstari umræðu á Útvarpi Sögu eftir að þáttastjórnendur hafa upplifað þennan menningarheim með eigin skilningarvitum,“ segir í bréfinu.

Arnþrúður sjálf virðist hins vegar ekki par hrifinn af boðinu líkt og DV greinir frá hér og kallar það „einhverja markaðsbrellu og tóma dellu“

Facebook færsla Kilroy: