Lögreglan á höfuðborgarsvæðinu fékk þrjú útköll vegna heimilisofbeldis í gærkvöldi. Að sögn lögreglu voru einstaklingar vistaðir í fangageymslu í tveimur tilfellum en í þriðja málinu komst hinn grunaði undan lögreglu.

Verkefni lögreglu í gærkvöldi og í nótt voru af ýmsum toga. Þannig var tilkynnt um 20 hross á Vesturlandsvegi á Kjalarnesi. Starfsmenn Reykjavíkurborgar voru ræstir út til að koma þeim á sinn stað.

Tveir ökumenn voru stöðvaðir í kringum miðnættið, en báðir eru þeir grunaðir um akstur undir áhrifum fíkniefna. Þeir voru handteknir og færðir á lögreglustöð til sýnatöku. Að því loknu gátu þeir um frjálst höfuð strokið.

Þá voru skráningarnúmer fjarlægð af tveimur bifreiðum vegna vangoldinna trygginga og vanrækslu að færa ökutæki til aðalskoðunar.

Loks hafði lögregla afskipti af 4 umferðaróhöppum á höfuðborgarsvæðinu; 3 óhappanna voru minniháttar og einungis um eignatjón á bifreiðum að ræða en fjórða óhappið var bílvelta á Suðurlandsvegi við Bolöldu. Betur fór en á horfðist að sögn lögreglu og sluppu ökumaður og farþegi meiðslalaust frá bílveltunni. Bifreiðin var mikið skemmd og flutt af vettvangi með kranabifreið.