Fangaverði á fertugsaldri hefur verið vikið frá störfum í Vestre Fængsel í Danmörku vegna sambands hennar við Peter Madsen sem er þekktastur fyrir að hafa myrt sænsku fréttakonuna Kim Wall um borð í kafbáti sínum, Nautilius, í Eyrarsundi á síðasta ári. Konan er tveggja barna móðir.

Konan hafði sjálf sagt upp starfi sínu sem fangavörður en hafði ekki skýrt fangelsismálayfirvöldum frá sambandi sínu við Madsen. Hún ætlaði að vinna út uppsagnarfrestinn en þegar fangelsismálayfirvöld komust að hinu sanna í málinu var henni strax vikið frá störfum og mun hún því ekki starfa meira við fangavörslu.

Það voru fangaverðir í Storstrøm Fængsel, þar sem Madsen hefur setið síðan í maí, sem komust að því að konan og Madsen eiga í einhverskonar ástarsambandi að því er virðist. Það voru sífelldar bréfaskriftir þeirra á milli sem komu upp um þau.

Ekstra Bladet skýrir frá þessu í dag. Fangelsismálayfirvöld hafa ekki viljað tjá sig um málið og það hefur lögmaður Madsen heldur ekki viljað.