LJósmyndasýning í Hafnarfirði sýnir börn í flóttamannabúðum sem fóru á námskeið í skapandi skrifum
Sýrlenski flóttamaðurinn og læknirinn dr. Bashar Farahat stendur að ljósmyndasýningunni Skilaboð frá flóttamannabúðunum dagana 25. til 28. október. Ljósmyndirnar sýna börn sem búa í flóttamannabúðum í Líbanon þar sem 1,1 milljón flóttamanna frá Sýrlandi dvelur við einkar erfiðar aðstæður. Setningarnar sem prýða hverja mynd eru hluti af afrakstri barnanna sem sóttu smiðju í skapandi skrifum hjá dr. Bashar Farahat í flóttamannabúðunum.
„Námskeiðinu var ætlað að veita börnunum svigrúm til að segja sögu sína – sögu sem er mörkuð af stríði og skelfingu, minningum um flótta og leit að hæli og vernd. Ég vildi gefa þeim pláss til að deila sársauka sínum en einnig vonum, á sinn eigin hátt. Börnin sungu, dönsuðu, grétu, brostu, drógu upp mynd af draumum sínum og stundum skrifuðu þau skilaboð frá búðunum. Setningarnar á myndunum valdi ég af kostgæfni úr skrifum barnanna á námskeiðinu,“ segir dr. Bashar Farahat.
Ljósmyndasýningin er haldin í samstarfi við Íslandsdeild Amnesty International. Gestum sýningarinnar verður boðið að skrifa skilaboð til barnanna í flóttamannabúðunum í Líbanon. Íslandsdeild Amnesty International, í samstarfi við dr. Bashar Farahat, mun tryggja að skilaboðin frá Íslandi rati rétta leið.
Mohammed Abdullah tók myndirnar og Shadi Jaber sá um uppsetningu. Dr. Bashar Farahat mun opna ljósmyndasýninguna formlega þriðjudaginn 25. október kl. 17:00 í Hafnarborg – menningar- og listamiðstöð Hafnarfjarðar og stendur opnunin til kl. 19:00.
