Róbert Guðfinnsson, athafnamaður á Siglufirði, sem undanfarin ár hefur lagt milljarða í uppbyggingu bæjarins, hyggst nú draga saman seglin í þeim mikla uppgangi sem hann hefur staðið fyrir.
Róbert á heiðurinn af byggingu Sigló hótels, Rauðku húsanna og nýs golfvallar svo fátt eitt sé nefnt og hefur því verið fleygt að á meðan fjárglæframenn hrunsins, kenndir við víkinga, fóru í útrás, hafi Róbert hafið innrás á Siglufjörð, en hann hefur sett að minnsta kosti um 5-6 milljarða inn í bæjarfélagið að talið er.
Selvík, félag á vegum Róberts, hefur sagt upp starfsmönnum undanfarið og frestað hefur verið byggingu golfskálans á svæðinu.
Róbert staðfestir í samtali við Trölla, fréttavef á Siglufirði, að hann ætli sér að hægja á:
„Á síðustu tólf árum höfum við staðið að viðamiklum fjárfestingum á Siglufirði. Það hefur verið fjárfest fyrir allmarga milljarða í uppbyggingu í samfélaginu. Við lítum svo á að nú sé tími til að hægja á og vinna úr því sem komið er. Ég hef orðið var við áhyggjur af því hvað starfsemi á okkar vegum sé orðin fyrirferðamikil í litlu samfélagi. Með því að við hægjum á þá hljóta að opnast tækifæri fyrir aðra að taka við boltanum og gera betur.”
