Frá því klukkan 18 á föstudaginn þar til klukkan 23.59 á sunnudaginn voru 66 manns skotnir í Chicago í Bandaríkjunum. Þar af létust 12. Meðal fórnarlambanna voru 11 og 13 ára börn. Þetta kom fram á fréttamannafundi lögreglunnar í borginni í gær.

Eddie T. Johnson, yfirlögregluþjónn, sagði það ekkert leyndarmál að lögreglan væri mjög ósátt við þetta óvenjulega mikla ofbeldi. Fram kom að 33 skotárásir hafi verið gerðar í borginni um helgina. 14 ungmenni voru skotin. Fórnarlömbin voru á aldrinum 11 til 62 ára. í einu tilfelli hið minnsta var skotið á fólk þar sem það tók þátt í götusamkvæmi.

46 voru handteknir um helgina fyrir meint brot gegn vopnalögum og 60 skotvopn voru haldlögð. En þrátt fyrir allar þessar handtökur var enginn handtekinn vegna skotárása helgarinnar.

Johnson sagði að skotárásirnar hafi ekki verið tilviljanakenndar heldur hafi þær tengst átökum glæpagengja.

Það er þó ljós í myrkrinu að frá áramótum hefur skotárásum í borginni fækkað um 30 prósent miðað við sama tíma á síðasta ári og morðum um 25 prósent.