Eyþór Arnalds, oddviti Sjálfstæðisflokksins í borgarstjórn, lagði ásamt öðrum fulltrúum minnihlutans fram bókun á fimmtudag hvar lýst var yfir óánægju með fjarveru borgarstjóra á fundinum vegna sumarleyfis hans. Þar var það sagt „ámælisvert“ og „óásættanlegt“ að hann sendi staðgengil á fundinn fyrir sig.
Eyþór segir við Morgunblaðið í dag að bókunin hefði ekki verið lögð fram ef fulltrúarnir hefðu vitað af veikindunum, en Eyþór segir veikindin hafa komið þeim á óvart og þeir fyrst lesið um þau í fréttum:
„Við óskum honum að sjálfsögðu góðs bata og að meðferðin gangi vel.“
Bókun minnihlutans:
„Stjórnarandstaðan telur það óásættanlegt að borgarstjóri skuli vera fjarverandi vegna sumarleyfis á síðasta reglulega fundi borgarráðs fyrir sumarfrí ráðsins. Það er sérstaklega ámælisvert í ljósi þeirra alvarlegu mála sem upp hafa komið síðustu daga, sem brýnt er að fjallað sé um áður en borgarráð fer í sumarfrí. Þannig er ekki ásættanlegt að borgarstjóri sendi staðgengil fyrir sig á fundinn. Þessi mál sem um ræðir eru eftirfarandi: álit umboðsmanns Alþingis um viðvarandi og vaxandi vanda heimilislausra, dómur Héraðsdóms Reykjavíkur sem dæmt hefur Reykjavíkurborg til að greiða starfsmanni Ráðhúss Reykjavíkur skaðabætur vegna slæmrar framkomu skrifstofustjóra skrifstofu borgarstjóra og borgarritara og úrskurður kærunefndar jafnréttismála vegna brots Reykjavíkurborgar gegn lögum um jafna stöðu og jafnan rétt kvenna og karla við ráðningu borgarlögmanns í ágúst árið 2017.“
