Egill Einarsson, betur þekktur sem Gillzenegger og DJ Muscleboy, tapaði málinu gegn íslenska ríkinu fyrir Mannréttindadómstól Evrópu.

Dómurinn var kveðinn upp í morgun þar sem fram kemur að ríkið hefði ekki brotið gegn Agli, en hann höfðaði mál árið 2012 gegn Sunnu Ben Guðrúnardóttur eftir að hún sakaði hann um nauðgun á Facebook-síðu. Þetta var í kjölfar þess þegar Egill birtist á forsíðu tímaritsins Monitor á því sama ári.

Egill krafðist þá einnar milljónar króna í miskabætur en ummæli konunnar voru dæmd ómerk og allur málskostnaður látinn niður falla. Egill var ekki sáttur með niðurstöðuna og fór með málið fyrir Mannréttindadómstól Evrópu, sem dæmdi að brot Sunnu ekki nægilega mikið til þess að hún þyrfti að greiða Agli bætur. Þau þurfa bæði að greiða sinn eigin málskostnað í málinu.

Síðastliðinn nóvember vann Egill mál gegn íslenska ríkinu fyrir dómstólnum. Þá höfðaði Egill mál gegn Inga Kristjáni Sigumarssyni. Ingi Kristján hafði birt mynd af Agli á Instagram-síðu sinni og skrifað við hana: „Fuck you rapist bastard.“ Voru þessi ummæli sögð vera brot á áttundu grein mannréttindasáttmálans sem segir að sérhver maður eigi rétt á friðhelgi til einkalífs.

Enn hefur ekki verið gefin út yfirlýsing frá lögfræðingi Egils.