Í gær tilkynnti Boris Johnson að hann segði af sér embætti utanríkisráðherra í bresku ríkisstjórninni. Hann hefur verið einn harðasti stuðningsmaður útgöngu Breta úr ESB, Brexit, og brotthvarf hans er mikið áfall fyrir Theresa May forsætisráðherra. Áður hafði David Davis, sem fór með samningamálin fyrir hönd Breta við ESB um útgönguna, sagt af sér embætti sem og aðstoðarráðherra hans. Johnson segir að áætlun May um samningaviðræðurnar við ESB sé ekki góð og feli í sér of náin tengsl við ESB.

Breskir fjölmiðlar fjalla að vonum mikið um málið í dag og sitt sýnist hverjum. Guardian segir að May hafi tekist á við Brexit-uppreisnarmennina og varað þá við að ef þeir flykki sér ekki að baki henni og fylgi stefnu ríkisstjórnarinnar eigi þeir á hættu að missa völdin til Jeremy Corby, leiðtoga Verkamannaflokksins, en hann vill gjarnan bola May úr embætti.

Financial Times segir að May virðist ætla að reyna að hanga á valdastól og berjast gegn öllum tilraunum til að velta henni úr sessi. Telegraph og The Times segja að klofningurinn í ríkisstjórninni þýði að Brexit sé úr sögunni og vitna í Boris Johnson sem sagði að „Brexit-draumurinn sé í dauðateygjunum“.

The Sun tekur aðeins aðra nálgun á þetta og biðlar til May og Johnson um að leggja deilurnar til hliðar þar til HM í knattspyrnu er lokið enda séu Englendingar að fara að spila í undanúrslitum keppninnar á morgun.