Ekki er hægt að þenja Lundúni meira út því borgin er umkringd opnu landi þar sem ekki má byggja. Þetta er leyst með því að reisa hærri byggingar. Borgaryfirvöld segja að þörf sé á 65.000 nýjum íbúðum í borginn á ári en aðeins 30.000 eru byggðar. Fasteignamarkaðurinn er því lokaður mörgum af yngri kynslóðinni sem neyðast til að leigja íbúðir fyrir háar fjárhæðir eða einfaldlega flytja út úr borginni og eyða háum fúlgum í samgöngur til og frá vinnu í borginni.

Á sama tíma og mikill húsnæðisskortur er í borginni standa mörg þúsund íbúðir og hús auð. Talið er að allt að 20.000 íbúðir standi auðar allt árið. Þær eru margar hverjar í eigu auðugs fólks sem notar þær nær ekkert enda er kannski meira spennandi að halda sig í Kaliforníu, Frakklandi eða New York og kannski voru fasteignakaupin bara hugsuð sem fjárfesting.

Borgaryfirvöld segja að aðeins átta prósent fólks hafi efni á að kaupa 80 prósent þeirra íbúða sem eru byggðar í borginni. Það gefur því auga leið að það eru sárafáir sem geta fjárfest í eigin húsnæði í borginni.