Í lok júní voru þau Alan Russell, Cliff Russell og Mallory Harrigan á krabbaveiðum nokkrar kílómetra undan strönd Southern Labrador í Kanada. Þau komu auga á stóran ísjaka á reki. Ofan á honum sáu þau litla veru. Þau sigldu því að ísjakanum til að sjá hvaða dýr væri á honum. Óhætt er að segja að þau hafi varla trúað sínum eigin augum þegar þau sáu hvaða dýr þetta var.

TV2 hefur eftir þeim að í fyrstu hafi þau haldið að þetta væri selur en svo var ekki. Þetta var heimsskautarefur. Þarna sat hann aleinn, horaður og lafhræddur. Yfir honum flugu mávar og biðu þess að hann dræpist.

Ekki er ólíklegt að refurinn hafi verið á ferð við strönd Labrador í leit að æti á ísnum. Síðan hefur ísinn væntanlega brotnað vegna hreyfinga á sjónum og refurinn staðið eftir einn á ísjaka sem rak frá landi.

Þremenningunum datt í hug að bjarga refnum en sáu að það yrði erfitt en þau ákváðu að reyna og brutu ísjakann með bátnum þannig að refurinn endaði í hafinu. Þá veiddu þau hann í háf og tóku um borð í bátinn. Þau reyndu að gefa honum kartöfluflögur og kex en hann var skelfingu lostinn og þorði ekki að koma nærri matnum. Eftir smávegis svefn lagði hann í að nálgast matinn og næra sig og fékk pylsur hjá þremenningunum.

Hann hætti síðan að hræðast fólkið þegar hann áttaði sig á að þau ætluðu ekki að gera honum neitt. Honum var síðan sleppt lausum þegar báturinn kom að landi.