„Það er magnað að pósta þessari mynd átta mánuðum eftir að brjóstið var tekið. Þetta ferðalag hefur verið það erfiðasta en jafnframt lærdómsríkasta hingað til.“
Á þessum orðum hefst færsla Ölmu Geirdal sem greindist með krabbamein í vinstra brjósti á síðasta ári. Alma er einstæð móðir og hafa veikindi hennar tekið mikinn toll af henni andlega, líkamlega og fjárhagslega.
„Þetta byrjaði á því að ég fór að finna mikið til í brjósti í lok sumars 2017. Ég fór til heimilislæknis fljótlega sem finnur ekkert athugavert en bókar mig í myndatöku sem ég beið eftir í tvo mánuði.“
Í myndatökunni fannst strax hnútur sem leit illa út og í kjölfarið var Alma bókuð á brjóstadeildina á Landspítalanum.
„Þarna var ég sjálf farin að finna hnútinn og var að drepast í brjóstinu. Það var strax ákveðið að taka þyrfti brjóstið og eitla þar sem þetta var fjögurra stigs krabbamein, sex sentimetra æxli í vinstra brjósti.“
Það var í nóvember á síðasta ári sem Alma fer svo í brjóstnámið.
„Þetta var rosalega erfitt en ég var samt svo fegin að losna við þetta. Það voru einnig teknir eitlar sem fannst ekkert í sem betur fer. Við tók sjö mánaða lyfjameðferðarferli eða sextán skipti takk fyrir, en engir geislar sem var æði.“
Alma lauk lyfjameðferðinni nýlega og tekur nú við töflumeðferð í fimm til tíu ár þar sem meinið hennar var hormónavænt.
„Hellings af blóðprufum, sprautum og eftirlit fram undan fylgir. Svo er hjartað eitthvað að stríða mér með óreglulegum hjartslætti svo það er hjartaómun fram undan. Hárið er að koma og eftir alla sterana hef ég þyngst svakalega svo nú tekur við endurhæfing.“
Alma segist koma þakklát út úr þessu erfiða ferli sem tekið hefur á alla fjölskylduna.
„Ég er gríðarlega stolt af börnunum mínum í þessum rússíbana og þakklát fólkinu mínu. Sérstaklega mömmu fyrir að mæta með mér í allar lyfjameðferðirnar nema eina. Áfram veginn.“
Stofnaður var styrktarreikningur fyrir Ölmu í þeirri von að hún þyrfti ekki að hafa fjárhagsáhyggjur ofan á erfiðleikana sem hún gengur nú í gegnum:
Rkn: 0140-26-064210
Kt: 060979-3759
