Klukkan 00.17 í nótt var bifreið ekið á hús, verslun, við Staðarberg í Hafnarfirði. Ökumaðurinn sagðist hafa stigið á bensíngjöfina í staðinn fyrir bremsurnar með fyrrgreindum afleiðingum. Skemmdir urðu á húsinu og bifreiðinni.
Einn ökumaður var handtekinn í gærkvöldi, grunaður um ölvun við akstur.
Sex ökumenn voru handteknir í nótt, grunaðir um akstur undir áhrifum fíkniefna. Einn þeirra reyndist vera sviptur ökuréttindum og var þetta ekki í fyrsta sinn sem hann er stöðvaður réttindalaus við akstur. Tveir reyndust aldrei hafa öðlast ökuréttindi og báðir eru þeir einnig grunaðir um brot á vopnalögum.