Breiðablik er komið á topp Pepsi-deildar karla en liðið mætti Grindavík í áttundu umferð í Grindavík.
Blikar spörkuðu Val úr toppsætinu með 2-0 sigri þar sem þeir Sveinn Aron Guðjohnsen og Gísli Eyjólfsson skoruðu mörkin.
Hér má sjá það góða og slæma úr leiknum.
Plús:
Ekki beint tengt leiknum en ég ætla að henda plúsi á Pepsi-deildina sjálfa bara. Þvílík veisla sem þetta er í sumar. Ekkert á milli.
Blikar voru mjög sannfærandi í sinni frammistöðu í kvöld og áttu sigurinn fyllilega skilið. Topp sætið tryggt í bili.
Sveinn Aron Guðjohnsen skoraði glæsilegt mark fyrir gestina í dag og heldur áfram að sanna það að hann er hörkugóður knattspyrnumaður.
Blikar eru einfaldlega með meiri gæði í sínum röðum og það var alveg ljóst í leik kvöldsins. Í raun aldrei í hættu.
Mínus:
Ég held að Óli Stefán verði ekki sáttur með sína menn í dag. Voru á eftir í flestu sem er ólíkt því sem við höfum séð í sumar.
Veðrið var ömurlegt í Grindavík og hafði mikil áhrif á leikinn. Mikill vindur og mikil rigning.
Leikmenn Grindavíkur ættu að þekkja liðsfélaga sína ágætlega en stundum er eins og þeir viti ekkert um hvorn annan. Virkuðu rosalega týndir og „lost“ á köflum í dag.
Arnþór Ari Atlason lét reka sig útaf í stöðunni 2-0 fyrir Blikum. Reif eitthvað kjaft við Sigurð dómara og fékk annað gult. Heimskulegt.