Forsetaframbjóðandinn Andri Snær Magnason varð fyrir því óláni í nótt að hjólinu hans var stolið. Andri uppgötvaði að hjólið væri horfið í morgun þegar hann var kominn út á stétt, fyrir framan heimilið sitt, en hann hafði ætlað sér að fara út að hjóla.
Í samtali við DV segir Andri að hjólið sem ber heitið Specialized hybrid sé mjög vel farið. Það er svart á litinn og er alveg eins og það sem sést á myndinni hér fyrir neðan.
„Það er eins og nýtt. Það sér ekkert á hjólinu fyrir utan eitt lítið gat á hnakknum,“ segir Andri og bætir við að þetta sé mjög fúlt. Sérstaklega í ljósi þess hversu fallegt veðrið er úti.
Andri vonast til að fá hjólið aftur og biðlar því til fólks að hafa augun opin ef það skyldi rekast á það hvort sem er á sölusíðum eða annars staðar.