Lögreglan á höfuðborgarsvæðinu sinnti fjölmörgum verkefnum í gærkvöldi og í nótt. Rétt fyrir klukkan tvö í nótt var maður í mjög annarlegu ástandi handtekinn fyrir framan veitingahús á Vegamótastíg. Að sögn lögreglu var maðurinn kominn úr flestum fötum og var að egna til slagsmála.
Þegar færa átti manninn í fangageymslu þá beit hann lögreglumann í fótinn. Maðurinn var vistaður í fangageymslu í kjölfarið. Fyrr um kvöldið, eða um klukkan 21, var ung kona í mjög annarlegu ástandi handtekin við Hofgarða þar sem hún var til ama. Hún var vistuð í fangageymslu meðan ástand hennar lagast.
Rétt fyrir klukkan eitt í nótt var erlendur skipverji handtekinn af Tollgæslunni við Sundahöfn með ætluð fíkniefni. Maðurinn var með efni til eigin nota og var hann vistaður í fangageymslu. Í ljós kom að maðurinn er einnig eftirlýstur hjá lögreglu vegna annars, ótengds máls.
Á fjórða tímanum í nótt var maður í mjög annarlegu ástandi handtekinn í Breiðholti. Hann hafði verið að valda íbúum ónæði; barið á dyr og reynt að komast inn hjá íbúum. Þá hafði maðurinn valdið skemmdum á bifhjóli sem stóð fyrir utan húsið. í ljós kom að maðurinn var með ætluð fíkniefni í vösum og var hann vistaður í fangageymslu.
Loks hafði lögreglan hendur í hári þriggja ökumanna sem ýmist eru grunaðir um ölvunarakstur eða akstur undir áhrifum fíkniefna.