Fulltrúar norska Framfaraflokksins hafa lagt til að bænaköll múslima í Noregi verði bönnuð. Þessi tillaga kemur til vegna þess að moskur í Noregi eru sagðar stefna á að byrja með bænaköll í ljósi þess að þau voru nýlega leyfð í tveimur moskum í nágrannaríkinu Svíþjóð.
Í ályktun flokksins í Buskerud kemur fram að margir líti á bænaköllin sem óviðeigandi og hreinlega pirrandi truflun. „Í Noregi ríkir trúfrelsi og að sama skapi ætti fólk að eiga rétt á því að heyra ekki bænaköllin ef það vill það ekki.“
Þetta er ekki fyrsta skipti sem Framfaraflokkurinn í Noregi leggur fram álíka tillögu. Fyrrverandi formaður flokksins, Carl Hagen, lagði fram sömu tillögu árið 2000.
Sitt sýnist hverjum um þetta; sumir fagna tillögunni á meðan aðrir óttast að hún brjóti í bága við mannréttindasáttmála Evrópu. Norska dómsmálaráðuneytið er að minnsta kosti þeirrar skoðunar að hún kunni að brjóta gegn 9. grein sáttmálans.
Jon Helgheim, talsmaður innflytjendamála hjá flokknum, segir við Vårt Land dagblaðið að honum sé í raun alveg sama um þennan tiltekna kafla mannréttindasáttmálans. „Það sem er mér efst í huga er að fólk fái frið og þögn í sinni heimabyggð. Það felur í sér að fólk verði ekki fyrir truflun af bænaköllunum.“
