Þeir sem ætla að fara í frí til Palma de Mallorca, höfuðstaðarins á Mallorca, verða að endurskoða ferðaáætlanir sínar ef þeir hafa haft í hyggju að leigja íbúðir af einkaaðilum. Borgarstjórnin hefur samþykkt að banna einkaaðilum að leigja út íbúðir sínar í gegnum öpp og heimasíður á borð við Airbnb. Bannið tekur gildi í júlí.

BBC skýrir frá þessu. Antoni Noguera Ortega, borgarstjóri, segir að markmiðið sé að stöðva sívaxandi útleigu á íbúðum í eigu einkaaðila en sífellt fleiri íbúðir hafa verið leigðar út til ferðamanna á undanförnum árum

Frá 2015 til 2017 jókst útleiga á íbúðum í eigu einkaaðila til ferðamanna um 50 prósent. Þetta hefur að mati gagnrýnenda orðið til þess að leiguverð í borginni hefur hækkað. Samkvæmt frét El Pais hefur leiguverðið í borginni að meðaltali hækkað um 40 prósent frá 2013. Þetta hefur vakið gremju meðal heimamanna sem finna vel fyrir hærra leiguverði. Ortega sagði í samtali við BBC að hann telji að fleiri borgir og bæir muni fylgja fordæmi borgarstjórna því með þessu sé hægt að ná jafnvægi.

Palma de Mallorca er fyrsta borgin á Spáni, sem er þriðja stærsta ferðamannaland heims, sem setur bann sem þetta.