Árum saman hefur áróðri verið útvarpað yfir landamæri Suður- og Norður-Kóreu frá Suður-Kóreu. Þetta hafa aðallega verið fréttir og tónlist sem hefur verið ætlað að ná eyrum einangraðra íbúa þessa lokaða einræðisríkis. En á miðnætti í nótt var slökkt á þessum útsendingum. Tilefnið er fundur leiðtoga ríkjanna tveggja næstkomandi föstudag.

Töluverð þíða hefur verið í samskiptum Norður-Kóreu við granna sína í suðri og Bandaríkin undanfarnar vikur. Í síðustu viku tilkynnti einræðisstjórnin að hún væri hætt tilraunum með kjarnorkuvopn og langdrægar eldflaugar.

Fréttaskýrendur hafa túlkað þetta sem mikilvæg skilaboð frá Kim Jong-un, einræðisherra, í tengslum við fund hans með Moon Jae-in, forseta Suður-Kóreu, næstkomandi föstudag og með Donald Trump, Bandaríkjaforseta, á næstu vikum.

En ekki eru allir sannfærðir um að hugur fylgi máli hjá einræðisherranum unga og telja að hann geti verið að blekkja umheiminn en leiðtogar Norður-Kóreu hafa verið þekktir fyrir að standa ekki við gerða samninga.