Á föstudaginn munu þingmenn í heilbrigðismálanefnd danska þingsins funda á lokuðum fundi. Fundarefnið er hvort banna eigi umskurð drengja. Á fundinn hafa heilbrigðisráðherrann, dómsmálaráðherrann, utanríkisráðherrann, varnarmálaráðherrann og kirkjumálaráðherrann verið boðaðir. Ræða á málið ítarlega og fara yfir hugsanlegar afleiðingar ef þingið samþykkir að banna umskurð drengja af öðrum ástæðum en læknisfræðilegum.

Auk ráðherranna hefur fulltrúum í útlendinganefnd, réttarkerfisnefnd, utanríkismálanefnd og kirkjumálanefnd verið boðið á fundinn.

Ekstra Bladet skýrir frá þessu. Haft er eftir Liselotte Blixt, formanni heilbrigðismálanefndarinnar, að til fundarins sé boðað þar sem fjalla þurfi um öryggi Danmerkur ef af banni verður.

„Það hefur verið rætt um að banni sem þessu geti fylgt ákveðinn áhætta hvað varðar öryggismál eins og var raunin með Múhameðsteikningarnar. Þess vegna verðum við að funda með ráðherrunum, svo við fáum vitneskju um hvort það er rétt.“

Allt stefnir í að þingið verði að taka málið til afgreiðslu þar sem 50.000 manns muni væntanlega skrifa undir borgaratillögu um að aldurstakmark verði sett á umskurð drengja. Nú þegar hafa rúmlega 35.000 manns skrifað undir tillöguna. Dönsk lög kveða á um að þingið verði að taka svokallaðar borgaratillögur til meðferðar ef 50.000 kosningabærir landsmenn skrifa undir tillöguna.

Ekstra Bladet hefur eftir Nasher Khader, þingmanni, að 55 múslimaríki séu í heiminum og að þau muni mótmæla hugmyndum um bann við umskurði drengja og það muni Ísrael einnig örugglega gera.

Danskir fjölmiðlar hafa fylgst nokkuð vel með umræðunni um tillögu Silju Daggar Gunnarsdóttur og átta annarra þingmanna um bann við umskurði drengja.